Paternidades desobedientes, paternidades activas

Diálogo aberto sobre as paternidades activas e a corresponsabilidade, este 19 de marzo na Casa do Matadoiro ás 20h.

Advertisement

Autocoñecemento para o cambio. Obradoiro vivencial teórico-práctico para homes

O grupo de homes de Compostela ‘Micromachinhos’, organizamos, coa colaboración da Concellaría de Igualdade do Concello de Santiago, un novo obradoiro. Nesta ocasión contaremos coa sabedoría de Tareixa Ledo Regal, formada en autocoñecemento, sexualidade e relacións humanas en Terapia de Reencontro, quen nos guiará no obradoiro “Autocoñecemento para o cambio. Obradoiro vivencial teórico-práctico para homes“.

Como en anteriores cursos, as prazas son limitadas e é necesario realizar inscrición previa enviando un correo para micromachinhos@gmail.com

Os días, horarios e local son:

• Dias 24, 25 e 25 de novembro e 15, 16 e 17 de decembro de 2017.
• Sextas feiras de 17h a 21h, sábados de 10 a 20h e domingos de 10h a 14h.
• Local: Casa do Matadoiro (Compostela)

Animádevos!

 

Paternidades desobedientes 2017

Encontro informal e aberto com 3 pais convidados a um diálogo sobre as novas formas de viver a paternidade, este 17 de outubro no Salón de actos da biblioteca Ánxel Casal ás 18:30h.

Obradoiro: Explorando a sexualidade dos homes

O curso é gratuíto e está orientado para homes, que poden inscribirse no correo electrónico micromachinhos@gmail.com. A inscrición será por rigorosa orde de chegada ao correo xa que ten límite de prazas (20).

O obradoiro impartirano Verónica Ramilo (traballadora social e sexóloga) eAlfredo Saborido (traballador social e sexólogo).  Os días e horarios son: día 24 de marzo, de 16 a 20h, día 25, de 10 a 14h e de 16 a 20 h, e día 26, de 10- a 4, no centro social O Matadoiro.

Tras a primeira e exitosa experiencia de traballo conxunta (todas as prazas cubertas) entre Micromachinhos, grupo de homes pola igualdade de Compostela, e a Concellaría de Igualdade, continuamos a nosa andaina na procura dunha sociedade máis xusta e igualitaria para todas e todos. Desta vez, e acompañando a celebración deste mes de marzo, encamiñamos a formación pondo o foco na sexualidade masculina co obradoiro “Explorando a sexualidade dos homes”. Este obradoiro pretende ser un espazo de reflexión, autocoñecemento e exploración da propia sexualidade e as relacións, e tamén un espazo para compartir entre todos os participantes as experiencias, as inquietudes, as dúbidas, os mitos e os recursos con que cada un pode contribuír ao grupo para poder vivir unha sexualidade satisfactoria e ter relacións baseadas nos bos tratos.

Os principais obxectivos son: xerar un espazo de confianza para coñecerse mellor, comprenderse, aprender a aceptarse e poder expresar o que cada un vive nas súas relacións e na súa sexualidade; explorar sobre a erótica cales son os límites de cada un, de que gostas, como e con quen e recoñecer que nos axuda e que nos dificulta; identificar que aspectos da sexualidade e as relacións quere cada un cultivar e reflexionar sobre posibles pequenas mudanzas a realizar; compartir recursos e ferramentas que cada un ten e xerar de novo, afianzando as nosas estratexias para poder convivir en relación o mellor posible e vivir unha sexualidade pracenteira; e por último, aprender a falar das relacións interpersoais que temos e que nos gusta ter, como as xestionamos, como afrontamos os conflitos e as mudanzas e que aspectos consideramos importantes.

Obradoiro de autocoñecemento corporal

[Vídeo feito por Matadorio Compostela sobre o curso]

A Concellaría de Igualdade do Concello de Compostela en colaboración co grupo de homes pola igualdade de Compostela Micromachinhos teñen a ben presentar o obradoiro de autocoñecemento corporal destinado a homes.

O obxectivo fundamental desta actividade é mellorar o autocoñecemento persoal poñendo no centro os coidados propios como punto de partida para mellorar as nosas relacións coas demais persoas. Os corpos dos homes, atravesados pola masculinidade dominante, son fogares excesivamente ríxidos onde calquera tipo de medo ou frustración é facilmente expresado con violencia. Aprender a recoñecer estas tensións tomando consciencia dos nosos corpos axuda a relaxar, a reducir o estrés e a agresividade. É unha vía de apertura dos nosos corpos cara o bo trato con nós mesmos como base onde nos impulsamos para estender ese trato en positivo co resto da xente. Unha cultura de paz que axude a desterrar a violencia, en particular a de xénero.

A metodoloxía de traballo parte dunha práctica precisa e sinxela que combina diferentes técnicas de traballo corporal: estiramentos, traballo respiratorio e de consciencia corporal. A metodoloxía adáptase ao ritmo da persoa co cal non é preciso ter  ningún tipo de coñecemento ou traballo realizado con anterioridade.

O curso será impartido por Belén Rial e Carmen Cunqueiro, terapeutas morfoanalistas con ampla experiencia no traballo psicocorporal.

A duración da actividade será de 16 horas. E terá lugar en decembro os días  3 (sábado de 10 h-14h e 16 h-20h) e 4 (domingo de 10-14h e 16 h-20h) no Centro Social “O Matadoiro” situado na Praza do Matadoiro de Compostela. As prazas para o curso son limitadas polo que se aceptarán as mesmas por rigorosa orde de chegada ao mail: micromachinhos@gmail.com indicando o nome e teléfono de contacto.

Esta é a primeira das actividades que impulsa a Concellaría de Igualdade destinada ao colectivo masculino e que pon de relevancia a importancia do papel que os homes podemos xogar para construír un futuro de igualdade entre mulleres e homes. Esta motivación, tal e como sinala o documento elaborado pola ONU en 2008 sobre o papel dos homes e os nenos no logro da igualdade, provén de diversas fontes; por exemplo, das relacións dos homes coas mulleres, da preocupación polo seu propio benestar persoal ou das súas familias ou do seu sentido da xustiza social.

É por isto que desde a Concellaría de Igualdade comprácenos abrir esta canle de participación confiando en que estas accións contribúan a abrir camiños que nos leven a unha sociedade máis xusta e igualitaria entre mulleres e homes.

Credit: Wellcome Library, London. Wellcome Images
A man posing naked, seated on a rocky outcrop in a leafy landscape. ca. 1900 
Copyrighted work available under Creative Commons Attribution only licence CC BY 4.0 http://creativecommons.org/licenses/by/4.0/

25 de novembro 2015: III Queima das gravatas

Este 25 de Novembro Dia Internacional contra a violencia de xénero, o grupo de homes de Compostela «Micromachinhos» organizamos por terceiro ano un exorcismo simbólico para contribuir a erradicar a violencia contra as mulleres. Asumimos a responsabilidade de reflexionar sobre este tema derredor do lume e queimar todas aquelas pautas sociais que cada quen de nós considere oportuno prender da súa gravata. Desterrando deste xeito a violencia das nosas relacións, dos nosos corpos, das nosas vidas.

Vémonos o día 25 ás 19h na rúa Carreira do Conde!

QUEIMA DAS GRAVATAS: Foi nos anos 60 cando as mulleres feministas deron en queimar os seus “brassaires” o que na nosa terra chamamos “suxeitador ou sostén”. Este acto simbólico desafiaba ao patriarcado e pulaba pola liberación dos corpos femininos alén das modas impostas. Nós queremos aprender delas queimando as nosas gravatas facendo, deste símbolo, unha evocación liberadora dos dogmas sociais asumidos polo facto de ter nacido varóns, mas tamén, da xenealoxía violenta que ten acompañado ao longo da historia ao suceso de ser home.

Esta queima das fitas está inspirada tamén na psicomaxia, unha técnica de sanación espiritual “non demostrable científicamente” de Alejandro Jodorowsky. Esta técnica mergúllase nos saberes dos chamáns, da psicoanálise e no efecto patético do teatro. Afírmase na premisa de que no inconsciente os actos simbólicos son procesados coma se fosen reais, deste xeito, un acto psicomáxico pode modificar o inconsciente chegando a sandar o trauma psicolóxico.

Queremos ademais que este acto supoña un recoñecemento para todas aquelas mulleres menciñeiras, bruxas, meigas… que foron maltratadas e asasinadas e con elas todo canto tiñan aprendido.

Obradoiro “Pôr a lupa sobre o micromachismo”

A próxima quarta-feira 15 de julho, de 19h a 20h30, os Micromachinhos guiaremos na Universidade Popular de Verao da Gentalha do Pichel um obradoiro intitulado: “Pôr a lupa sobre o micromachismo“. Animades-vos?

Obradoiro micromachinho na Trisca

O sábado 30 de maio os Micromachinhos tivemos um encontro no centro social da Trisca (e no parque) que nos ofereceu a possibilidade de parar e mirar para atrás e para nós.

Que fixemos até agora? Que queremos fazer? Como queremos seguir avançando? Lançamo-nos estas e muitas outras perguntas que nos servirom para descobrir que em junho imos cumprir 3 anos de caminho e que a vontade de continuar é grande.